Menno en Siemen lopen noast mekoar over de akkers. De siepels hemmen et stoer met e dreugte. Mor et onkruud, liekt doar niet veul last van te hemmen.
Menno: Hai.hai, wat is e bovenkant van e Pieterzielster klei weer haard. Geen wonder dat e plantjes de kop der niet deur kriegen. Het is wat met die klimoatverannering. Het liekt weer dezelfde kaant op te goan as veureg joar. Dreug en armetierig spul op et laand.
Siemen: Et is ok al n mooi pooske leden dat we n buitje had hemmen. Mag van mij vanoavend wel wat begunnen te miegelen. Mien gras en boontjes binnen der wel aan toe en ik verrek et om de tuunslang der op te zetten.
Menno: Dat mag ok niet zo mor meer van et wotterbedrief. We moeten zuneg aan doen met wotter. Putemmer uut e regenbak noast de plee om deur te spoelen en de theekan leeggieten op de hortensias! Buutendes binnen de brandstofkosten zo verhipte hoog, dat beregenen messchien wel niet eens uut kin. We zillen et mor oafwachten.
Siemen: Et het ok weer zo zien veurdelen, want mien vraauw wil nou ineens weer soamen met mij onner de douche en ien bad. Gezelleg jong en dat bespoart een nust wotter.
Menno: As jim dan mor niet drekt een half uur langer onner e douche plakken blieven! Dan span je et peerd weer achter e woagen. Gelukkeg hemmen we nog flink wat kuub ien e regenput zitten. Wij kinnen nog een dag of wat veuruut.
Siemen: Zo is dat. We kinnen der toch niks aan veranneren. Mor eemen wat aans: jim hemmen ok met die puzzeltocht metdoan niet? Was et de muuite weerd?
Menno: t Was hartstikke mooi man! We kwammen op plakken iene buurt woarvan je het bestoan niet wisten. We kregen opdrachten met veur onnerwegens, doar mossen we een foto van moaken en opsturen noar Gert Jan Lania. Ient dörpshuus zagst de mooiste creaties op het schaarm, tot blote billen aan toe! Der was ok nog levendege muziek ient dörpshuis, gezellig heur!
Siemen: Et moeide me ok wel dat we niet met konnen.
Veur dizze zummer stijt der et één en anner op t program. Das ik ien t KnipOOG.
Menno: Hestoe de enquete ok ienvuld en ienleverd? Wij wel. Hopelek kriegen we gauw te heuren wat de uutkomst was. Ik bin slim benijd.
Siemen: Tuurlek hemmen wij hem ienvuld. Der stonnen een barg punten op woardast op reageren konst. Het is denk ik wel goed dat zukswat es een keer laangskomt ien een dörp.
Het is ok al een mooie zet leden dat de dörpsvernieuwing der was. Wiest doe nog wanneer dat was?
Menno: Me dunkt dat is wel 30 joar leden. Toen hemmen ze stroaten vernijd en loater is Diepswal ok nog aanpast. Mor as we nog hoger wotter kriegen, dan mag de beschoeiing wel weer verder omhoog.
Siemen: En ien annere landen hemmen ze ok weer wotteroverlast, deur dikke plensbuien of malloten die de muur van n stuwdam opbloazen. Doar bist mooi kloar met.
Menno: Ik zag op tillevizide n kirrel met twee Vlaamse Reuzen op en nek. Die arme beestjes konden niet zwemmen. Hij mos ze hogerop brengen, aans hoalen ze de kerst niet.
Siemen: Over zwemmen en zwammen. Hest ook keken noar et koamerdebat over ‘Groningers boven gas’? Doar werd oardeg wat oafzwamd, mor ik kreeg niet et idee dat wij der hier wat met opschieten,
Menno: Nou ja, ze kriegen wel langzoam mor zeker ien e goaten dat we hier bij de gasopslag Griepskerk ok last kriegen en dat is dan wel omdat Griepskerk het probleem veur de rest van Nederland oplöst. En we binnen nog lang niet van die gas-brut òf.
Siemen: We hemmen ok al last van scheuren ien e muur en dat is niet omdat ik gien onnerhold doe. Me dunkt de bodem gijt hier op-en-del. Ien e zummer komt et omhooog en as de rest van Nederland gas neudeg het, dan zak we weer wat.
Menno:Ja en boerenploatsen en mestkelder, dat binnen drekst flinke klussen, die meer dan 40.000 Euro kosten. Dan komst drekst ien e mallemolen van e ambtenoaren terecht.
Siemen: Me dunkt, omschoelen dat volk. Geef ze met vaderdag n meetlint, n troffel en n hoamer, dan kinnen ze drekst aan de slag met schoadeherstel. En het mooiste is, ze hemmen der ok nog es mooi dreug weer bij!