‘Achter et hot’ verscheen in 2021 en 2022 in ‘Oog op Pieterzijl’ en vertelt in het Pieterzielsters over de recente gebeurtenissen van de afgelopen periode. Op de website zullen Menno en Siemen regelmatig terug komen. Krinkjespijen op de brug of met sigaretje in de slootswal.
Host al weer n joar verstreken. Et laand is leeg en e schuur is vol en et eerste waark veur et veurjoar is al doan. De kolde wiend jagt omme keet, mor boer en arbeider zitten mooi waarm ien e schuur achter et hot sorteerwaark te doen.
Siemen: Zo et kacheltje gloeit weer mooi. Zo wil et spul wel dreugen en kin wij et ok wel volholden. Buutendes hadden we de oogst al mooi dreug ien e schuut kregen.
Menno: Doe hest makkelek proaten kammeroad. Die huufst de energie reeknen niet te betoalen. Die eerpels maggen dit joar wel van gold weden om wat uut e kosten te kommen.
Siemen: En niet allineg de eerpels. Man, man met dizze priezen vandoag de dag roakst al gauw aan de bedelstaf. Alles gaait zo’n bietje over de kop ja. Gelukkeg hadden we een knappe zummer had en huufde de kachel toen niet voak aan.
Menno: Ja, de zummer was verhipte mooi, ok wel dreug trouwens. Mor e kiender konden mooi zwemmen ien diep. En wat hemmen we ien septembere n mooie zoaterdag had met ‘De dag van de Lauwers’. Geweldig, wat een feest was dat en wat n volk, veul olde bekenden kwammen weer es een kiekje nimmem ien Pieterziel en omstreken.
Siemen: Doar kin ik over metproaten. Mien buurman mos e dag hier officieel openen. Hij kwam al bij me veur verkleedkleren en hij mos een bel hemmen. Nou is et gewoon al zo’n grode belhoamel, nou toen helemoal. Moar, ik moet zeggen, hij het er wat moois van moakt. Ja het was mooi. Hadden we ok wel neudeg noa twee joar Corona.
Menno: Die dag liet mooi zien hoe biezunder et is om aan et wotter te wonen en hoe et wotter een rol speuld het ien de geschiedenis van dizze streek. Dan moest niet alleneg denken aan de viskerij ien Zoltkamp, mor ok een dörp as Stroobos profiteerde van et vervoer over et wotter.
Siemen: En dan niet te vergeten dat de eerpels en bieten hier zo goed groeien willen vanwege de vruchtboare klei die de Lauwers hier del lijt het.
Menno: Moest ook de stienbakkerij niet vergeten. As die olde monniken vroeger niet ien e goate kregen hadden dat ze hier met e handvörmen kloostermoppen moaken konnen, dan wadden Gerkesklooster en Klooster Auwerd nooit bouwd. Trouwens ik wiet ok nog wel dat ze tussen Stroobos en Visvliet langs et Sarabos klei oaf groeven veur de stienfeabriek aan de Lauwers.
Siemen: Ik heb wel es heurd dat er vroeger ok een stienfabriek ien Visvliet was, mor ik heb gien idee woar die stoan het.
Menno: Dat kin ik dij zo vertellen. Die ston woar loater de camping was, achter de Auberge Visvliet, mor dat is al meer dan 100 joar leden. Sums zigst nog wel wat ‘Visvlaaiters’ op een dak leggen. Dat was een biezunder formaat dakpan, dat allenig in Visvliet bakken werd.
Siemen: Nou we et toch over stienen hemmen. Ik heurde dat Bertus Fennema, de olde burgemeester van Zuudhörn, een boek schreven het over n architect uut Visvliet. Het schient dat die man ok veur ons dörp huzen ontworpen het.
Menno: Klopt dat was Eppe van de Molen, die woonde ien Visvliet aan de Eisingastroat. Het huus wat er veur zichzelf bouwde staait er nog en et pakhuus dat achter zien huus aan e Heirweg bouwd wer, is der ok nog. Soamen met zien compagnon Gelderloos het er dik 200 huzen ontworpen. Die huzen kinst er voak zo uut, want ze hemmen een aparte stijl. In Pieterziel het er de meesterwoning ontworpen en et veurhuus van een boerderij aan e Westerwoarddiek. Mor hij het ok veul arbeiderswoninkje bouwd. En veul huzen stoan de nog. Moest het boek mor een dag of wat lenen rond Kerst en OldNij.
Siemen: Veur we et wieten is et joar al weer over. Sunterkloas is al weer noar huus en had zien boot dit joar gelukkeg aan e goeie kant van brug liggen. Dat was ok weer en hiel festijn. Ik kreeg nog een lekkere banketstoaf.
Menno: Mor verder was 2022 n joar om snel te vergeten. Met al die reboelie ien et oosten, die torenhoge priezen veur gas en licht en vallende sterren as Ali B, Waylon, Matthijs en de Duutse Manschaft op dat corrupte WK doar ien die zandbak. En nou mor hopen dat de FC ankommend joar der weer bovenop komt, want der is dit joar al veul te veul degradeerd!